NOVIDADES



O proxecto “Xeometría Aplicada”, realizado polos investigadores do CITIC Paula Castro Castro, Adriana Dapena Janeiro e Francisco Vázquez Araújo, forma parte da exposición “Campus Vivo. Investigar na Universidade” do Museo Nacional de Ciencia y Tecnología - MUNCYT Coruña, que abriu de novo as súas portas o 1 de xullo.

A iniciativa “Xeometría Aplicada” propón unha serie de actividades orientadas ao público xeral para poñer de relevo a importancia da xeometría en enxeñaría e en arquitectura e, ao mesmo tempo, dar a coñecer algúns traballos do campo da xeometría aplicada realizados na UDC.

Ademais de investigadores do CITIC, tamén participan no proxecto os profesores da UDC Miguel Brozos Vázquez, María José Pereira Sáez, María José Souto Salorio e Ana D. Tarrío Tobar. Conta tamén coa colaboración da profesora da USC Ana Belén Rodríguez Raposo.

O obxectivo desta exposición, realizada por CRUE Universidades Españolas e o Museo Nacional de Ciencia y Tecnología, é trasladar á sociedade a importancia da investigación que se realiza nas institucións académicas de ensino superior para a mellora do desenvolvemento territorial e social e a calidade de vida dos cidadáns.

LER MÁS

O CITIC organiza a xornada “Últimas oportunidades no Programa Marco para as tecnoloxías ICT: Call Green Deal - H2020”, que ten o obxectivo de coñecer con antelación os contidos da convocatoria Green Deal H2020, cuxa apertura está prevista para o mes de setembro deste ano.

A xornada terá lugar o próximo luns 13 de xullo de forma online e contará coa participación de Marina Martínez, persoal destacado do CDTI (Centro de Desenvolvemento Tecnolóxico e Industrial) na oficina desta entidade en Bruxelas (oficina SOST, Spanish Office for Science and Technology) e coordinadora do programa de xestores especializados en Programa Marco da UE.

En todos os temas propostos no borrador do programa de traballo, as tecnoloxías TIC e a dixitalización son claves para o éxito dos proxectos gañadores. Por iso, esta convocatoria supón unha oportunidade para os investigadores do CITIC e as súas entidades colaboradoras, ante a finalización do programa marco actual.

Programa da xornada:

  • 11:00 h - 11:15 h Apertura da xornada a cargo do director do CITIC, Manuel F. González Penedo
  • 11:15 h - 12:45 h Avance da convocatoria Green Deal H2020
  • 12:45 h - 13:00 h Conclusións e peche da xornada

Inscricións

Descargar programa

LER MÁS

O investigador do área de Ciencia e Enxeñaría de Datos do CITIC, Carlos Vázquez Cendón, foi nomeado representante español no Management Committee da Acción Cost “FinAI-Fintech”. O nomeamento foi realizado por parte da Coordinadora Nacional de COST, Noelia Romero López, dependente da Subdirección Xeral de Internacionalización da Ciencia e Innovación do Ministerio, tras aceptar a participación española en “FinAI-Tech”. Esta acción pon en contacto a investigadores de máis de 30 países, polo que supón unha gran oportunidade.

O investigador Carlos Vázquez participou na elaboración da proposta da Acción COST “FinAI-Fintech and Artificial Intelligence in Finance - Towards a transparent financial industry”. En concreto, participou especialmente no equipo de traballo 2: “Transparent versus Black-Box decision support models in the financial industry”. Entre outros temas, abordarase a falta de aceptación por parte dos organismos reguladores financeiros de técnicas de Intelixencia Artificial actualmente utilizadas por bancos e entidades financeiras de xeito crecente. Cabe destacar que un grupo de investigadores do CITIC xa obtivo resultados no uso de técnicas de IA baseadas en aprendizaxe automática para a resolución de problemas no sector financeiro.

LER MÁS

O investigador da área de Ciencia e Enxeñaría de Datos do CITIC Ricardo Cao participa no ciclo de conferencias web sobre o COVID-19 posto en marcha pola Fundación Universidade da Coruña (FUAC), no que se tratan diversos temas de actualidade relacionados coa pandemia.

A charla de Ricardo Cao terá lugar o vindeiro xoves 2 de xullo baixo o título “Os datos da pandemia COVID-19”. Nela, o investigador do CITIC explicará os labores realizados desde o comité de expertos da Acción Matemática fronte ao Coronavirus do CEMat, do que é presidente.

A inscrición é libre e gratuíta previo rexistro.

Máis información e inscrición

LER MÁS

  • O obxectivo do convenio é potenciar os resultados de investigación e transferencia para mellorar a calidade de vida e a participación das persoas con discapacidade a través de recursos tecnolóxicos.
  • O acordo foi asinado esta mañá polo reitor da UDC, Julio Abalde, e a directora xerente de ASPACE Coruña, Sonia Ruiz Vargas.

O Centro de Investigación TIC (CITIC) da UDC promove un convenio de colaboración entre a Universidade da Coruña e ASPACE Coruña, asociación pioneira en Galicia en atención integral a persoas con parálise cerebral, para potenciar os resultados de investigación e transferencia entre o CITIC e ASPACE Coruña e mellorar desta forma a calidade de vida e a participación das persoas con discapacidade a través de recursos tecnolóxicos.

O acordo foi asinado esta mañá polo reitor da UDC, Julio Abalde, e a directora xerente de ASPACE Coruña, Sonia Ruiz Vargas. Tamén estiveron presentes no acto, por parte do CITIC, o director, Manuel F. González Penedo, e o subdirector, Javier Pereira Loureiro, e por parte de ASPACE Coruña, a subdirectora, Mª Carmen Barreiro Santos, e a responsable de comunicación, Patricia Pérez Villar.

Esta alianza, que ten o fin de promover relacións de beneficio mutuo en materia de colaboración académica,  consolida a cooperación existente entre o CITIC e ASPACE Coruña, iniciada en novembro de 2019 a través dun grupo de traballo dedicado á creación de contidos informáticos dirixidos a potenciar os programas de rehabilitación física e cognitiva de persoas con parálise cerebral. Así, as entidades pretenden mellorar as actividades ás que ambas se dedican por separado e optimizar os recursos, establecendo unha colaboración nos ámbitos da sociedade e a tecnoloxía que satisfagan as necesidades e expectativas do colectivo atendendo á diversidade.

O CITIC ten como principais obxectivos potenciar o uso das tecnoloxías da información e as comunicacións por todos os colectivos da sociedade atendendo á súa diversidade, promover e favorecer o traballo conxunto entre organismos de persoas con discapacidade, institucións comunitarias e universidades, así como fomentar o desenvolvemento e uso das TIC orientadas a colectivos de persoas discapacidade e familias, satisfacendo as súas necesidades e expectativas.

LER MÁS

O investigador da área de Ciencia e Enxeñaría de Datos do CITIC Ricardo Cao participou na Xornada de Investigación Matemática en tempos de Covid, que tivo lugar o pasado mércores 10 de xuño de forma virtual. Ricardo Cao interveu como presidente do comité de expertos da Acción Matemática contra o Coronavirus, impulsado polo Comité Español de Matemáticas (CEMat).

A xornada estivo organizada polo Instituto Andaluz de Matemáticas (IAMAT) na súa sede na UGR, o IEMath-GR, e contou con diversos investigadores en Estatística, Matemáticas e Ciencias da Computación que compartiron os seus últimos traballos relacionados coa pandemia. O investigador do CITIC Ricardo Cao foi o encargado da apertura da sesión.

Máis información

LER MÁS

O CITIC foi nomeado membro do comité xestor de PLANETIC, a Plataforma tecnolóxica española para a adopción e difusión das tecnoloxías electrónicas, da información e a comunicación. O representante do CITIC no órgano será o responsable de Transferencia Tecnolóxica e Innovación do centro, Manuel Bustabad.

PLANETIC pretende ofrecer unha visión global e integrada do sector TIC español, atender ás necesidades TICs dos diferentes sectores económicos españois, impulsar o posicionamento internacional do sector TIC español e servir como espazo de traballo común para axentes I+D+i e empresas do sector.

Así, o comité xestor de PLANETIC é o órgano encargado da xestión estratéxica e operativa da plataforma. Entre as súas funcións destacan a representación da mesma ante os diferentes organismos; fomentar a participación e colaboración entre os membros en iniciativas, proxectos, programas e actividades de interese para a plataforma; e establecer e coordinar a Axenda estratéxica.

LER MÁS

O CITIC colabora na organización de #HACKatHOME, o primeiro hackathon 100 % virtual de Galicia, que se celebrará do 27 ao 30 de xuño. O obxectivo deste encontro é crear solucións innovadoras en Galicia para adaptar o tecido empresarial a unha nova realidade trala crise sanitaria.

Así, #HACKatHOME involucra a empresas tecnolóxicas, universidades e persoas de diferentes ámbitos para construír solucións tanto físicas como dixitais para cinco dos grandes retos da industria, o comercio e o emprego, durante catro días de traballo en remoto con actividades paralelas online e o pitching final de proxectos.

Os proxectos serán valorados por un comité de expertos, do que forman parte representantes do CITIC. Os tres mellores proxectos terán un apoio económico de 1000 € e un seguimento específico durante seis meses por parte das institucións participantes no hackathon.

Os cinco retos que se definiron son os seguintes:

  • Reto 1. Solucións “low touch”: ideas para mellorar os espazos de traballo, así como a xestión de produtos, materiais e ferramentas evitar a dispersión do virus.
  • Reto 2. Repensando a venda ao público: ideas para incrementar a seguridade dos espazos comerciais e evitar o impacto negativo no volume de negocio.
  • Reto 3. Traballo en remoto: ideas para optimizar o traballo en remoto ou minimizar o contacto interpersoal nos sectores que requiran traballo presencial.
  • Reto 4. Unha industria máis local: ideas para reducir as necesidades de desprazamento da industria tanto para a compra como para a oferta.
  • Reto 5. Un novo concepto de “equipo”: ideas para coordinar equipos de traballo nun novo contexto de separación física.

Inscripción abierta hasta el próximo 21 de junio

LER MÁS

A investigadora do CITIC Thais Pousada foi seleccionada para participar no grupo de traballo "Wheelchair Educators Package Development Group" da International Society of Wheelchair Profesionals (ISWP). O equipo está composto por 31 expertos dun total de 20 países de todo o mundo, que traballarán durante os próximos dous anos na elaboración dun paquete de formación para profesionais de ciencias da saúde relacionado coa prescrición da cadeira de rodas.

O obxectivo é que esta formación proporcione os contidos e competencias necesarias para que os profesionais deste ámbito poidan certificarse como expertos na prescrición da cadeira de rodas.

Este grupo de traballo está auspiciado pola ISWP, unha entidade que naceu en 2015 coa misión de servir como recurso global para os estándares e a prescrición de servizos de cadeiras de rodas, para que todas as persoas que a necesitan reciban produtos e servizos apropiados, permitíndolles o acceso á educación, o emprego e a atención médica e a participación social.

LER MÁS

O CITIC doou un lote de pantallas pediátricas de protección individual destinadas aos usuarios de ASPACE Coruña. A entrega realizouse esta mañá ao fisioterapeuta de ASPACE Coruña, Rubén Carneiro, por parte do director do CITIC, Manuel F. González Penedo, o subdirector, Javier Pereira, e o responsable da unidade de sistemas, Alejandro Mosteiro.

As pantallas foron fabricadas coa impresora 3D do CITIC e serán utilizadas polos usuarios do centro educativo de ASPACE Coruña, nenos e mozos de idades comprendidas entre os 3 e os 21 anos, e do centro de atención temperá, que atende a nenos de ata 6 anos.

O CITIC e ASPACE Coruña manteñen unha colaboración desde 2019 a través dun grupo de traballo que ten o obxectivo de definir contidos informáticos para mellorar a avaliación e programas de rehabilitación de persoas con parálise cerebral.

Máis información

LER MÁS

Publicáronse recientemente os resultados obtidos durante o segundo ano de traballo do proxecto HiPERFORM, a través dunha newsletter que recolle os principais datos. O proxecto, no que participan investigadores da área de Servizos e Redes Intelixentes do CITIC, iniciouse en maio de 2018 e finalizará en abril de 2021.

HiPERFORM (High performant Wide Band Gap Power Electronics for Reliable, energy Efficient drivetrains and optimization through multi-physics simulation) é un proxecto internacional de I+D que ten como obxectivo principal a aplicabilidade industrial de semicondutores de alto rendemento con materiais de banda ancha no campo da mobilidade intelixente, nun contexto no que mellorar a calidade do aire e evitar o quecemento global é unha alta prioridade a nivel mundial. Dado que o sistema de transporte en Europa contribúe significativamente ás emisións totais de gases de efecto invernadoiro e ao quecemento global, colaborarase desta forma para achaiar o camiño en Europa para un sistema de transporte descarbonizado.

Os resultados esperados do proxecto permitirán aos fabricantes europeos de compoñentes de vehículos eléctricos baseados en WBG, dispositivos de carga e sistemas de proba para ofrecer excelentes tecnoloxías para a industria automotriz, para desenvolver vehículos ecolóxicos accesibles de próxima xeración.

Consulta a newsletter do proxecto HiPERFORM

LER MÁS

A investigadora do Centro de Investigación TIC (CITIC) da UDC, Verónica Bolón, acaba de ser nomeada nova académica de número da Academia Joven de España (AJE), seleccionada xunto con outros 12 membros, entre as 185 candidaturas presentadas. A escolla foi realizada por un comité internacional independente, formado por investigadores de prestixio de diferentes áreas de coñecemento, e aprobada pola Xunta Xeral da AJE o pasado xoves 28 de maio.

Dende a AJE destacan que “só un 7 % dos solicitantes foron seleccionados nun proceso realmente competitivo, especialmente debido á excelente traxectoria profesional dos candidatos. Ademais dos méritos académicos, tivéronse en conta outros factores como a diversidade dos candidatos e das áreas nas que traballan”.

A Academia Joven de España é un foro que pretende servir como plataforma para os novos investigadores, para ofrecer a oportunidade de colaborar e contribuír a dar forma ás políticas de fomento do coñecemento en España. Así, ten o obxectivo de promover a ciencia como opción profesional entre a xuventude, dando visibilidade a mozos e mozas excepcionais, e de fomentar as contribucións da ciencia á sociedade a través do desenvolvemento de novos enfoques co fin de resolver problemas de importancia nacional e internacional.

Verónica Bolón é enxeñeira informática, doutora en Informática pola Universidade da Coruña e profesora no Departamento de Ciencias da Computación e Tecnoloxías da Información da UDC. Como investigadora do CITIC, actualmente traballa en temas relacionados con varias áreas da Intelixencia Artificial, especialmente en Aprendizaxe Máquina para Big Data. En 2018 recibiu unha Beca Leonardo da Fundación BBVA para o traballo de investigación “Cando o tamaño importa: selección de características para wearables”. Tamén é secretaria da Asociación Española para a Intelixencia Artificial (AEPIA) e está comprometida co fomento das vocacións científico-tecnolóxicas entre as nenas, participando en actividades de divulgación e coordinando o nodo da Coruña do proxecto Inspira STEAM.

LER MÁS

A Sociedade de Estatística e Investigación Operativa (SEIO) e a Fundación BBVA convocaron a primeira edición dos premios SEIO-Fundación BBVA, destinados a recoñecer as achegas científicas máis innovadoras e influíntes en estatística e investigación operativa. Estes galardóns teñen o obxectivo de incentivar o traballo dos mellores investigadores nestas áreas e de impulsar a proxección destas disciplinas ao conxunto da sociedade.

Os premios están dirixidos a investigadores en estatística e investigación operativa de nacionalidade española, ou doutra nacionalidade que realicen o seu traballo de investigación nunha universidade ou centro científico de España.

Nesta convocatoria concederanse un máximo de cinco premios, cada un coa dotación bruta de 6.000 euros, todos eles na modalidade de achegas pioneiras e influíntes na investigación, a escala internacional, en estatística e investigación operativa.

O prazo de presentación de candidaturas está aberto ata o 30 de xuño de 2020.

Máis información

 

Por outra banda, a Fundación BBVA lanzou unha convocatoria de axudas a equipos de investigación científica SARS-CoV-2 e COVID-19, destinada integramente a apoiar a xeración de coñecemento relacionado coa actual pandemia e os seus efectos.

Os proxectos poderán ter unha duración máxima de dous anos, e poderán optar a estas axudas grupos de investigación de universidades e centros de investigación públicos ou privados, así como de empresas e outras organizacións.

As áreas obxecto desta convocatoria son:

  • Biomedicina
  • Big Data e Intelixencia Artificial
  • Ecoloxía e Veterinaria
  • Economía e Ciencias Sociais
  • Humanidades

Máis información

LER MÁS

Os investigadores do CITIC Álvaro S. Hervella, Lucía Ramos, José Rouco, Jorge Novo e Marcos Ortega presentaron un traballo na 45th International Conference on Acoustics, Speech, and Signal Processing - ICASSP 2020. Este congreso é un dos máis relevantes a nivel internacional nos ámbitos de acústica, fala e procesado de sinais. Este ano estaba previsto que se celebrase en Barcelona, pero debido á crise do COVID-19, finalmente celebrouse de modo online.

O traballo, titulado “Multi-modal self-supervised pre-training for joint optic disc and cup segmentation in eye fundus images”, ofrece avances innovadores para a análise de imaxe médica oftalmolóxica. Estes avances enmárcanse dentro das técnicas de intelixencia artificial usando aprendizaxe profunda, onde se suscitaron paradigmas novidosos de pre-adestramento multimodal. Esta formulación ten un enorme potencial no dominio de análise automática de imaxe médica, como mostra a aplicación concreta que, neste caso, aborda a segmentación de importantes estruturas anatómicas do ollo (copa e disco), cuxo análise está directamente relacionado co diagnóstico de patoloxías de enorme incidencia poboacional, como é o glaucoma.

LER MÁS

A empresa Torusware, spin-off da UDC creada por investigadores do CITIC, foi galardoada co Premio Nacional de Informática 2020 na categoría Premio Ramón Llull, outorgado pola Sociedade Científica Informática de España (SCIE) e a Fundación BBVA.

Torusware, cuxos socios promotores son os investigadores do CITIC Guillermo López Taboada, Juan Touriño Domínguez e Ramón Doallo Biempica, foi premiada “pola súa actividade no ámbito da computación de altas prestacións e a súa aplicación ao procesamento de grandes volumes de datos, o seu dinamismo e aposta polo I+D+i, e polo seu impacto nacional e internacional”.

Na modalidade Investigadores Mozos Informáticos foi recoñecido Daniel Valcarce, enxeñeiro de software de Google que previamente desenvolveu o seu labor investigador no CITIC. Ademais, a tese doutoral doutro premiado, Adrián Pérez Diéguez, foi dirixida polos investigadores do CITIC Margarita Amor e Ramón Doallo.

Cómpre recordar que en edicións anteriores foron premiados un total de tres investigadores do CITIC. En 2019, Nieves R. Brisaboa  foi condecorada co Premio Nacional de Informática na categoría Premio Ángela Ruiz Robles. En 2018, Ramón Doallo recibiu o premio na categoría Premio Aritmel, e nesa mesma edición, David Vilares foi galardoado co premio na modalidade Investigadores Mozos Informáticos.

LER MÁS

O investigador da área de Intelixencia Artificial do CITIC, Juan Romero, participa como editor no special issue “Artificial Intelligence and Complexity in Art, Music, Games and Design” da revista de código aberto Entropy, que se publica mensualmente en MDPI.

Este special issue centrarase no uso de ideas complexas e en métodos de Intelixencia Artificial para analizar e avaliar propiedades estéticas e para impulsar sistemas que xeren artefactos esteticamente atractivos, en campos como a música, artes visuais, poesía, deseño e outras tarefas creativas.

A data límite para a presentación de traballos é o próximo 30 de setembro.

Máis información

LER MÁS

Investigadores do CITIC coordinan o proxecto europeo de innovación educativa “AI+ Developing an Artificial Intelligence Curriculum adapted to European High School”. Liderado polo investigador da área de Intelixencia Artificial do CITIC, Francisco Javier Bellas Bouza, o proxecto ten o obxectivo de desenvolver un plan de estudos de Intelixencia Artificial adaptado á educación secundaria en Europa. Este plan de estudos estará dirixido a estudantes de 15 a 17 anos con formación básica previa en robótica e programación.

O proxecto ten unha duración de tres anos e conta cun financiamento de 371.512 euros, o maior de todas as concedidas na convocatoria K201 (educación escolar) en 2019.

O consorcio que integra o proxecto está composto por seis socios de cinco países: España, Italia, Lituania, Eslovenia e Finlandia. O equipo do CITIC desenvolverá todos os resultados intelectuais en colaboración co resto dos centros escolares asociados.

Este traballo supón unha oportunidade tanto para a UDC como para o sistema educativo galego, xa que permitirá posicionarse como referente en innovación tecnolóxica en España e Europa, potenciando unha materia que se prevé que terá gran demanda nos próximos anos en todo o mundo.

LER MÁS

O investigador da área de Intelixencia Artificial do CITIC, Francisco Javier Bellas Bouza, participa como editor no special issue “Deep Image Semantic Segmentation and Recognition” da revista de código aberto Applied Sciences. Esta revista abarca todos os aspectos das ciencias naturais aplicadas e publícase online de forma semestral por MDPI.

O obxectivo deste special issue é reunir investigacións de vangarda para aportar unha visión xeral das arquitecturas de redes neuronais profundas axeitadas e as áreas de aplicacións con métricas de rendemento obxectivo.

A data límite para a presentación de traballos é o próximo 30 de novembro.

Máis información

LER MÁS

O Consello Europeo de Investigación (ERC) publicou a convocatoria Advanced Grant, que ten o obxectivo de dar apoio a proxectos de investigación excelentes e altamente innovadores de calquera campo das ciencias, liderados por investigadores sénior con polo menos 10 anos de experiencia que desenvolvan o traballo nun dos Estados Membros da UE ou dos países asociados.

O investigador principal da ERC Advanced Grant deberá ter un historial de logros de investigación significativos nos últimos 10 anos, que o identifiquen como líder no seu campo de investigación. Os proxectos terán unha duración máxima de 5 anos e un financiamento de ata 2,5 millóns de euros.

Esta convocatoria está aberta ata o 26 de agosto de 2020, sendo a última convocatoria dentro do Programa Horizon 2020, e prevense outorgar 209 proxectos.

Debido á complexidade que supón preparar unha proposta competitiva para esta convocatoria, a Oficina Europea organiza dous talleres online sobre “Como preparar unha proposta Advanced Grant 2020 exitosa”:

LER MÁS

O investigador da área de Intelixencia Artificial do CITIC, Juan Romero, participou como chair na 9th International Conference on Computational Intelligence in Music, Sound, Art and Design (EvoMUSART). A conferencia tivo lugar o pasado mes de abril e foi publicada en Springer Lecture Notes in Computer Science (LNCS).

O congreso EvoMUSART celebrouse por primeira vez como un workshop en 2003, con periodicidade anual, e ten obxectivo de reunir a investigadores que utilizan técnicas de intelixencia computacional para tarefas artísticas, brindando a oportunidade de promover, presentar e discutir os proxectos nos que se atopan traballando neste ámbito.

A próxima edición terá lugar en 2021 en Sevilla, e o investigador Juan Romero participará de novo como chair.

LER MÁS

Esta mañá publicouse na sede electrónica da UDC unha nota informativa do Vicerreitor de Política Científica, Investigación e Transferencia, Salvador Naya Fernández, na que se indica que se retoman os prazos administrativos relativos aos procedementos de selección de persoal investigador con cargo ao capítulo VI.

Descargar nota informativa

Esta nota informativa aplica ás seguintes convocatorias de contratación do CITIC:

Ref.: 2020/CP/63

Ref.: 2020/CP/73

Ref.: 2020/CP/82

Ref.: 2020/CP/64

Ref.: 2020/CP/74

Ref.: 2020/CP/84

Ref.: 2020/CP/65

Ref.: 2020/CP/75

Ref.: 2020/CP/85

Ref.: 2020/CP/66

Ref.: 2020/CP/76

Ref.: 2020/CP/86

Ref.: 2020/CP/67

Ref.: 2020/CP/77

Ref.: 2020/CP/87

Ref.: 2020/CP/69

Ref.: 2020/CP/78

Ref.: 2020/CP/88

Ref.: 2020/CP/70

Ref.: 2020/CP/79

Ref.: 2020/CP/90

Ref.: 2020/CP/71

Ref.: 2020/CP/80

Ref.: 2020/CP/91

Ref.: 2020/CP/72

Ref.: 2020/CP/81

 

LER MÁS

Os investigadores da área de Intelixencia Artificial do CITIC, Felicidad Aguado, Gilberto Pérez e Concepción Vidal, foron invitados a presentar un traballo da súa autoría, no campo de Representación do Coñecemento (KR), na próxima edición da International Joint Conference on Artificial Intelligence (IJCAI). Trátase da conferencia internacional máis importante no ámbito da IA, caracterizada por contar cun sistema de selección de artigos moi estrito; na próxima edición aceptáronse unicamente 592 traballos dun total de 4717 que foron presentados.

O traballo que presentarán os investigadores do CITIC enmárcase na liña do artigo “Forgetting auxiliary atoms in forks”, publicado en 2019 na revista Artificial Intelligence, a máis veterana, recoñecida e prestixiosa no seu ámbito. Ambos traballos profundan na introdución dun novo operador en programación lóxica con potencial aplicación na supresión de variables e a anonimización de bases de coñecemento.

Estaba prevista a celebración da IJCAI en xullo de 2020 en Yokohama (Xapón), pero debido á crise sanitaria producida polo COVID-19, foi aprazada para xaneiro de 2021, pero aínda non está claro o formato da súa celebración. En calquera caso, a organización sinala que a difusión dos novos resultados de investigación dos autores é o foco principal da conferencia e, polo tanto, a publicación das actas realizarase en xullo deste ano, segundo estaba previsto.

LER MÁS

A investigadora do CITIC, catedrática de Computación e Intelixencia Artificial da UDC e presidenta da Asociación Española para a Intelixencia Artificial (AEPIA), Amparo Alonso, participa como relatora no ciclo de charlas “El País co teu futuro”, organizado por El País. Este evento online está composto por diferentes charlas de temáticas variadas, e ten o obxectivo de inspirar ás xeracións máis novas á hora de elixir o seu futuro profesional.

Esta sexta edición celebrarase o próximo 13 de maio e, ademais da Intelixencia Artificial da man de Amparo Alonso, tocará ámbitos da medicina, enxeñaría, marketing, audiovisuais, etc.

Más información

 

LER MÁS

Un ano máis, o CITIC da UDC organiza o Congreso XoveTIC, un evento científico que se consolidou ano tras ano como unha cita obrigada para o persoal investigador junior (predoutoral e posdoutoral) do ámbito TIC.

Esta terceira edición, que terá lugar os días 8 e 9 de outubro de 2020, celebrarase nun formato online debido á crise sanitaria do SARS-CoV-2.

O prazo de recepción de abstracts a través da plataforma EasyChair comeza hoxe e termina o próximo 17 de xuño.

O obxectivo do congreso é crear un espazo de encontro para o debate científico e contribuír deste modo á formación dos asistentes. O XoveTIC, cuxa inscrición é gratuíta, suporá unha oportunidade ideal para que as persoas participantes compartan as súas investigacións nun ambiente colaborativo e distendido. Na súa pasada edición, o XoveTIC contou con preto de 100 asistentes e nel presentáronse máis de 50 comunicacións, tanto en formato oral como en póster.

Cabe destacar que o XoveTIC é un congreso xenuíno que se diferencia da maioría dos congresos que se celebran en España no ámbito das TIC, nos cales reúnense investigadores senior con anos de experiencia. Así, o XoveTIC pode ser o punto de partida de novas investigacións e proxectos que impliquen cambios disruptivos na sociedade e na tecnoloxía tal e como actualmente as coñecemos.

Máis información

LER MÁS

O investigador do CITIC Fidel Cacheda participou na 15ª reunión do comité de expertos do WG6 da ECSO (European Cyber Security Organization). A reunión tivo lugar en formato online este xoves 7 de maio.

O WG6 é un dos grupos de traballo composto polos membros da ECSO, centrado na Strategic Research and Innovation Axenda (SRIA) e as Ciber Tecnoloxías. As actividades do WG6 xiran en torno a catro áreas principais para definir as prioridades en ciberseguridade do Horizonte Europa e o Digital Europe Programme (DEP): sociedade e cidadáns; transformación dixital en verticais; datos e economía; e tecnoloxías básicas e disruptivas.

Tamén se anunciaron dous webinars asociados á actividade do WG6, enmarcados nunha serie de 10 seminarios que reunirán á comunidade do ámbito da ciberseguridade nacional e europea nos sectores público e privado. Os seminarios están estruturados en torno a unha estratexia para validar e reforzar a visión dunha ciberseguridade europea e o seu valor engadido para todos os seus interesados.

LER MÁS

  • A Sociedade Científica Informática de España (SCIE) seleccionou ao CITIC entre todas as candidatura presentadas.
  • O congreso contará coa colaboración de Turismo da Coruña e o Colexio Profesional de Enxeñaría Informática de Galicia (CPEIG).

A Coruña, 7 de maio de 2020.- O Centro de Investigación TIC (CITIC) da Universidade da Coruña é a sede elixida pola Sociedade Científica Informática de España (SCIE) para a celebración do Congreso Español de Informática (CEDI) en 2024. A SCIE realizou unha chamada á presentación de candidaturas para a busca de sedes do CEDI 2024, valorando aspectos como a dispoñibilidade de infraestruturas na cidade e a experiencia do equipo na organización de congresos científicos.

Así, a organización do congreso articularase a través do CITIC, comandada polos investigadores de destacada traxectoria Amparo Alonso Betanzos, Bertha Guijarro Berdiñas, Ramón Doallo Biempica, Juan Touriño Domínguez, Nieves Rodríguez Brisaboa e Miguel Rodríguez Luaces, e reforzada polo apoio do director do CITIC, Manuel F. González Penedo, e a directora do Campus Innova da UDC, Susana Ladra, que exercerán tamén como enlace con ambas entidades. O congreso contará coa colaboración de Turismo da Coruña e o Colexio Profesional de Enxeñaría Informática de Galicia (CPEIG).

A de 2024 será a VII edición do CEDI, que se celebra cada edición nunha cidade española diferente, e que pretende servir como punto de encontro para profesionais da investigación, innovación e ensino universitario do ámbito da enxeñaría informática, e fomentar as relacións e intercambios entre os distintos países iberoamericanos no campo da informática.

Sobre o CITIC

O CITIC é un Centro de Investigación de Galicia que potencia o avance e a excelencia en I+D+i aplicado ás TIC. Impulsado pola Universidade da Coruña, no ano 2016 a Xunta de Galicia recoñece ao CITIC como Centro Singular de Investigación de Galicia 2016-2019 pola súa traxectoria científica. En 2019 renova esta acreditación e pasa a denominarse Centro de Investigación de Galicia. A actividade científica do CITIC estrutúrase en catro áreas de investigación principais: Intelixencia Artificial; Ciencia e Enxeñaría de Datos; Computación de Altas Prestacións e Servizos e Redes Intelixentes; e unha área de investigación transversal a todas elas, a de Ciberseguridade. Un dos obxectivos do CITIC pasa por poñer ao alcance da sociedade os resultados das súas investigacións, polo que no centro promóvense accións de ciencia cidadá e actividades divulgativas que potencien as vocacións científicas e garantan a renovación do talento no ámbito das TIC.

LER MÁS

O investigador do CITIC José A. Iglesias Guitián está colaborando na organización do Embodied-AI Workshop, que se celebrará os próximos 14 e 15 de xuño enmarcado na conferencia CVPR 2020 (Conference on Computer Vision and Pattern Recognition), o principal evento a nivel internacional en Visión Artificial, Machine Learning e Intelixencia Artificial dirixido a estudantes, académicos e investigadores deste ámbito. O evento celebrarase de forma telemática, aínda que estaba prevista a súa celebración en Seattle.

O Embodied-AI Workshop ten o obxectivo de reunir a investigadores dos campos de visión artificial, linguaxe, gráficos e robótica e albergará tres desafíos centrados nos problemas de navegación de puntos, navegación de obxectos e a transferencia de modelos de contornas simuladas ao mundo real.

A inscrición está aberta ata o próximo 15 de maio.

Máis información

LER MÁS

Os investigadores do CITIC Ricardo Cao e Susana Ladra participan no proxecto de investigación posto en marcha pola empresa pública Edar Bens SA para analizar a presenza do SARS-CoV-2 nas augas residuais da Coruña, Arteixo, Cambre, Culleredo e Oleiros. O estudo determinou que, aínda que chega material xenético do virus á planta, este elimínase antes da súa saída ao mar, polo que queda descartada a súa diseminación ambiental na costa coruñesa.

Este era un dos obxectivos do proxecto de investigación que realiza un equipo multidisciplinar liderado pola investigadora do Grupo de Microbioloxía do Instituto de Investigación Biomédica da Coruña (INIBIC), Margarita Poza, e do que tamén forman parte o CHUAC, a UDC e o CICA.

O proxecto analiza distintos puntos do alcantarillado para medir a incidencia do SARS-CoV-2 na poboación e predicir futuros brotes, a través da análise da carga viral presente nas augas residuais e lodos da depuradora de Bens, xa que recolle datos de toda a poboación, incluíndo persoas que pasaron o COVID-19 sen sabelo. Ademais, o mantemento da toma de mostras no tempo permitirá estar alerta ante posibles repuntes de COVID-19.

O proxecto foi invitado a sumarse á rede europea NORMAN de investigación científica sobre augas residuais para colaborar nun estudo conxunto con plantas de tratamento de Francia, Noruega, Alemaña, Holanda, Eslovaquia, Suíza, Suecia, etc.

LER MÁS

A investigadora da área de Intelixencia Artificial do CITIC, Thais Pousada, continúa ofrecendo formación, a través de webinars, en colaboración con diferentes entidades. Os cursos que impartiu durante as últimas semanas son os seguintes:

  • Todos os martes de marzo e abril impartiu formación para a inserción laboral de mulleres migrantes coa ONG Mestura.
  • 16 de abril impartiu o relatorio “Entendendo a Estatística: Aplicación a Terapia Ocupacional” organizada polo Colexio de Terapeutas Ocupacionais de Galicia (COTOGA).
  • 29 de abril ofreceu un webinar na plataforma Miríadax sobre “Coidado do propio corpo: Consellos para unha boa hixiene postural”, enmarcado no ciclo de sesións #YoMeQuedoEnCasa promovido pola plataforma. A sesión foi seguida por persoas de diferentes países.

Por outra banda, o 30 de abril participou por invitación da organización nunha reunión da Rehabilitation Engineering and Assistive Technology Society of North America (RESNA). O relatorio “AT provision in the estafe of COVID-19” tivo o obxectivo de abordar o impacto do COVID-19 no proceso de prescrición e provisión de produtos e tecnoloxías de apoio a nivel internacional, sendo unha oportunidade para aprender sobre como promover a entrega de tecnoloxía de apoio e protexer á poboación vulnerable durante esta crise.

LER MÁS

Os investigadores do área de Intelixencia Artificial e Ciencia e Enxeñaría de Datos do CITIC, Alejandro Ponte Castro, Enrique Fernández Blanco, Alejandro Pazos e Cristian R. Munteanu, publicaron en ScienceDirect o artigo “Automatic assessment of Alzheimer’s disease diagnosis based on deep learning techniques”.

O obxectivo principal deste traballo foi desenvolver un sistema que detecte automaticamente a presenza da enfermidade de Alzheimer en imaxes de resonancia magnética saxital (IRM), para a detección temperá da enfermidade.

Do traballo desenvolvido polos investigadores do CITIC pódense extraer dúas conclusións: en primeiro lugar, os danos relacionados coa enfermidade de Alzheimer e as súas etapas pódense distinguir na IRM e, en segundo lugar, os resultados obtidos usando modelos de deep learning con resonancia magnética saxital son similares ao estado da arte, que utiliza a resonancia magnética de plano horizontal.

Aínda que as IRM de plano saxital non se usan comunmente, este traballo demostrou que son tan efectivas como a IRM doutros planos para identificar a enfermidade de Alzheimer nas primeiras etapas. Isto podería facilitar futuras investigacións.

LER MÁS